Bernard wrote:Admiror linguam Sardam artissimis consanguinitatis vinculis coniunctam cum lingua Latina.
So de accordu cun tegus, sa limba Sarda est una de sas piùs bellas de su mundu. Ma no est una limba sene problemas, su fattu de essere una limba divisa in duas variedades no ajùat a la pòdere insignare in sas iscolas (attualmente no est insignada in logu per unu). No semus mai resessìdos a nos pònere de accordu de cale variedade Sarda insignare. Su Logudoresu/Nugoresu (su Sardu meu) faeddadu in su centru-nord de s'isula est cussu piùs cunservativu, praticamente identicu a su Sardu medioevale e simile a su Latinu vulgare; invece su Campidanesu faeddadu in s'ala meridionale est cussu qui s'est distaccadu de piùs dae sa limba medioevale, tantu de resultare quasi incumpensibile a sos de su nord. Si querimus fàghere unu cunfrontu, podimus nàrrere qui sa situazione est simile a cussa de su Castiglianu e de su Portuguesu; qui sun parentes, nàschidos dae una limba comune, ma no sun piùs sa matessi limba. In Sardigna hamus una situazione simile, a un'ala b'est su Logudoresu/Nugoresu, qui est sa matessi limba, cun pagas differentzias in fattu de pronuntzias; a s'àter'ala b'est su Campidanesu, qui sonat que un'àtera limba, cun 'nd'una fonetica simile a su Portuguesu, cun pronuntzias nasales, vocales abertas o serradas, e cun bona parte de su vocabulariu differente dae cussu de su Logudoresu.
Su guvernu regionale in passadu hat proadu a criare una limba unificada, e hat incomintzadu a la impittare in sos attos amministrativos, cun su resultadu qui custa limba artificiale est odiada ind'ogni logu de Sardigna; sos Campidanesos la odian ca est troppu "nordica", sos Logudoresos la odian ca est troppu misciada cun su Campidanesu. Sos problemas sun mannos e no est fàtzile a los resolvere, pro como faghimus comente podimus, e la trasmittimus a sos àteros sighende a la faeddare
Saludos dae Sardigna, a nos intendere chito